«Кугарня», 1994 ий 18 март

Англичан, американ, финн...
А ынде япон

Пытартыш жапыште Марий Эл Республикыш йот элла гыч шуко профессор чӱчкыдынак толын коштеш. Кодшо кок-кум ийыште марий йылмым шымлаш да тунемаш толшо-влак ятырынак лийыч. Марий Эл Республик да тудын калыкше дене немыч, норвежец, американ, финн, англичан да япон студент ден шымлызе-влак палыме лийыныт. Ӱмаште япон рвезе, студент Такаси Танака стажировкым эртен. Тудо Марий университетыште марий студент-влаклан англичан йылмым туныктен да тыгодымак шкежат марий йылмым тунемын.

Ме, марий калык, шкенан шочмо йылмынан кӱлешлыкшым аклен огына мошто. А тӱня мучко мемнан ойнам марий огыл айдеме-влак шымлат, тунемыт.

Таче тендам ик тыгай шымлызе дене палымым ыштена. Тудо мӱндыр Япон мланде гыч толын. Азий ден Африкысе калык-влакын йылме ден культурыштым шымлыше институтын (тудо Токиосо университет пелен пашам ышта) профессоржо Кацуто Мацумура. Тудо Марий Элыш икымше гана толын. Толымыжын амалжым тыге умылтара:

-- Мый шымлызе улам, сандене Марий Элыште марий йылмым кузе шымлат, кузе палат -- мыланем оҥай. Могайрак тыште йылме ситуаций, йылме шотышто могайрак проблеме -- тиде мыйын тӱҥ шымлыме проблемем. Тылеч посна Совет ушем пытыме деч вара руш огыл калыкын илышыж нергенат шонымаш кугемын.

Японийыште марий калык, тудын йылмыж нерген шымлымаш тӱҥалын. Кызытеш тиде йодыш дене пашам ыштыше мый шкетын гына улам. Но умбакыже тиде кыл пеҥгыдемеш манын ӱшаныме шуэш. Ончыч мый марий йылме нерген руш источникла гыч веле паленам. Нунышт вет совет жапыштак возымо лийыныт. Садлан, тушто чыным возымо улмаш але уке -- тергаш толынам, -- манеш япон йылмызе.

Шукерте огыл профессор К. Мацумура ден тудын аспирантше Т. Танака Марий Элын госсекретарьже Н. Рыбаков да корреспондент-влак дене вашлийыныт. «Образованийыште марий йылме могай верыште шога да Марий Элыште могай закон дене йылме аралалтеш?» -- профессорын тӱҥ йодышыжо лийын.

Тидлан Николай Федорович тыге вашештен:
-- Образований системыште марий йылмылан пытартыш жапыште кугу вниманий ойыралтеш. СССР улмо годым, 20 ий наре марий йылме ӧрдыжтӧ ыле. Тунам политике тыгай лийын -- ик калыкым ышташ. Тиде политике марийлан веле огыл, моло тыгыде калыкланат эҥгекым конден. Шуко марий ӧрдыжтӧ ила. Башкирийыште марий йылмым тунемыт. А. Киров, Свердловск, Угарман областьлаште, Татар мландыште туныкташ тӱҥалыт веле. Кызыт мемнан туныктымо паша министерстве шочмо йылмылан моткоч кугу верым ойыра. Але марте оласе йоча садлаште марла туныктен огытыл. Ӱмаште 18, тений Йошкар-Оласе 34 йоча садыште марий йылмым тунемыт. Ончыч ме йоча-влак марла тунемаш огыт тӱҥал манын шоненна. Вет тыште тӱрлӧ калык: руш, татар, чуваш, украин да тулеч молат -- илат. Кызыт нуно марий йоча-влак дене пырля марла тунемыт. А закон шотышто теве мом каласем. Кодшо ийын йылме нерген законым ямдылыме ыле, икымше вариантым. Кӱшыл Каҥаш тудым икымше лудмаште сайлан ыш шотло. Кызыт у вариант ямде. Правительствыште тудым ончымо, Кугыжаныш Погыныш лукташ ыштыме. Депутат-влак ты законым сайлан шотлат гын, тудым илышыш пурташ тӱҥалына. Но тений тиде законым садак приниматлат. Марий йылме тиде закон почеш государственный йылме лиеш. Руш ден марий йылме иктӧр праван лийыт. Вашке терминологический комиссий пашажым пытара. Могай руш термин уло -- ончыкыжым, тудым чыла марла кучылташ тӱҥалына. Лишыл жапыште печатьыш луктына. Южо шомакым ме йӧршеш марла ыштена. Ожнысо тошто марий мут-влакым угычын пуртена.

К. М. Те ойылышда: марий да руш йылме государственный лийыт. Ме палена: марий илымыште кок литературный йылмыште уло. А кузе тидым ышташ шонеда?

Н. Р. Кок вариант денат. Кызыт Марий Эл Республикын у Конституцийжым ямдылена. Тудым тений пеҥгыдемдаш кӱлеш. Тушто тыгай пункт уло: Марий Эл Республикын президентше марий лийшаш, марий йылмым палышаш. Тыгак кок государственный йылме лийшаш: руш да марий (олык, курык).

К. М. Финляндийыште чыла кагазыште кок: финн да швед -- йылме дене возымо. Сандене пеш шуко окса кая. Тендан кум йылме лиеш. Тунам мыняр окса кӱлеш, кузе шонеда?

Н. Р. Йылмым окса дене висаш ок лий. Сандене ме тыге ыштена: курык марий кагаз-влак курык марий йылме дене, олык марийын олык марла каяш тӱҥалыт.

Япон профессор корреспондент-влакын йодышыштлан вашмутым пуа.

Корр. Те шуко йылмым шымледа. Историй гычын ончалмаште йылме-влак йомын толыт але шукемыт веле?

К. М. Шукынжо йылме-влакын чотышто кушкын манын ойлат. Коло ий ончыч тӱнямбалне кок тӱжем йылме дене мутланат манын ойленыт гын, кызыт 4-5 тӱжем йылме улмо нергенат ойлат. Мыняр шуко шымлет, туняр шуко муат. Китай йылмат икте веле шонена. Такшым гын йӱдвел ден кечывалвел китай йылме-влак улыт. Нуно пеш чот ойыртемалтыт. Венгр ден финн, англичан ден немыч йылме-влак кузе ойыртемалтыт -- тугак китай йылме-влакат.

Корр. А япон йылмыште тыгай уло?

К. М. Япон мландын кечывалвелже гыч айдеме йӱдвелыш толеш гын, нуно ваш-ваш огыт умыло.

Корр. Общий государственный йылмышт уло?

К. М. Тиде литературный йылме. Шке диалектышт уло. Но литератур ден диалект йылме коклаште ойыртем пеш кугу. Радио дене, телевиденийыште передаче-влак шукыж годым литератур йылме дене каят. Верысе передаче веле южгунам диалект йылме дене лектеш.

Корр. Диалект йылме ынже йом, але, мӧҥгешла, вияҥже манын, мо ышталтеш? Государстве могай позицийыште шога?

К. М. Мый кунам тӱҥ школыш коштынам, тунам мемнан туныктышна литератур йылме верч азапланен. Шке наречий дене кутырышо ӱмбак удан ончен. А кызыт тенденций тыгай -- литератур йылмым мондаш тӱҥалыныт. Шке диалектышт дене кутырат. Нине наречий-влакын ойыртемышт нигунамат огыт йом, мӧҥгешла, кушкыт веле.

Кацуто Матцумура шым йот йылмым пала. Молан манаш гын, наука пашаште ик йылмым гына палыме дене серлагаш ок лий. Профессор турко, индий калыкын йылмыжым шымлыше-влак дене пырля пашам ышта. Тӱҥ шотышто тудо шке йылмыжын ойыртемжым шымла.

Н. ДМИТРИЕБА ямдылен.