1992 ий сентябрь гыч 1993 ий август марте мемнан республикыште Японий гыч толшо самырык рвезе Такаси Танака илыш. Тудо Марий кугыжаныш университетыште марий да финн-угор филологий отделенийысе студент-влаклан англичан йылмым туныктен да шкежат марий йылмым тунемын. Кызыт тудо адакат Марий республикыште. Ты гана Такаси шкетын огыл, а Токио университетыште финн-угор йылмым шымлыше, профессор Матцумура Казуто дене пырля толын.
К. Матцумура Марий кугыжаныш университетын марий да финн-угор йылме-влак кафедрым вуйлатыше, профессор Ю. В. Андуганов дене ондакак палыме лийыныт улмаш. Но тений К. Матцумура шкежак республикышкына толын. Тудак Такаси Танакалан марий йылмым шымлаш да тунемаш ойым ыштен.
Казуто Матцумура шкеже Хельсинкыште тунемын. Тушто икымше гана Матцумура «Ончыко» журнал ден «Ямде лий» газетым ужын. Тышечынак тудын марий йылме деке шонымаш шочын, марий яллаште лияш шонымаш лектын. Казуто марий йылме деч посна моло финн-угор йылме-влакымат шымла. Кызыт тудо эстон йылме дене пашам ышта.
К. Матцумура дене интервьюм лишыл номерыште лудын кертыда.
Н .Д.